頭先G.E.M.先拋完「和諧論」，唔敢再寸前輩，似乎唔敢再辣興甄妮。不過日前寸爆G.E.M.唔打招呼目中無人的甄妮，今晚擔任頒獎嘉賓，未知兩人有否狹路相逢？

甄妮頒最優秀流行男女歌手同全球華人至尊金曲獎，身穿黑色透視長裙的甄妮現身時，兩位司儀禮貌周周打招呼大叫「甄妮姐姐」，又問佢食飯未，甄妮即讚兩位司儀受教，李志剛同甄妮講﹕「打招呼，打招呼﹗」甄妮就話﹕「係呀，最緊要係打招呼。」之後又話：「我喺外面住左好耐，返嚟好多唔同面孔。有時我好面懵，我好想同佢哋打招呼，但佢哋見到我，唔知識定唔識，我又唔知點稱呼，所以有好多誤會。」之後甄妮再爆咗句﹕「使唔使搞到咁大呀﹗」邊個搞到咁大？搞大乜嘢？

問佢點樣做優秀歌手，甄妮就語帶相關再寸G.E.M.，佢話：「做歌手要唱得好、要靚，要注意自己儀表。我今晚好隆重，平時好隨便，涵養同修養都好重要，要學識更多嘢，我到今日，我都喺度學緊嘢；希望每個歌手色香味都咁正，唔係只係唱歌好，千祈唔好目中無人。」唔知G.E.M.喺現場有乜反應？