因政變流亡海外嘅泰國前總理他信，靜雞雞嚟香港會妻順道散心嘅消息曝光後，噚日吸引大批傳媒喺佢入住嘅酒店追訪。見慣大場面嘅他信，懶理外界目光，自我悠然自得咁拖住老婆響商場名店買嘢同晒恩愛，更幽默咁係商場通道扮急步跑狀，同死跟嘅記者捉迷藏。
無官一身輕嘅他信，因為妻子快將牛一，大前日專登由北京飛嚟香港，會合響泰國來港嘅愛妻。兩夫婦連日嚟手拖手響中環名店購物。他信妻購物後話，今次嚟香港買咗二千蚊化妝品，又話今日會返泰國。
佢冇答丈夫去咗邊，但透露他信喺北京兩星期，寄情騎馬同打保齡。至於他信有冇見過喺北京出席「中國-東盟峯會」嘅泰國臨時政府總理，佢就冇直接回應。有傳聞他信會前往印尼峇里。
他信陪老婆逛公司期間，曾經獨自上過兩間航空公司，話想返曼谷，但冇交代詳情，可能搵機位。他信曾去錶舖留低隻靚錶畀老闆，唔係抵押，只係抹油，跟住同老婆坐車過海去咗半島酒店歎茶。
對於呢位貴賓嚟咗香港，保安局局長李少光話「我都係睇報紙先睇到」，同泰國駐港領事館嘅答法一樣，連傳媒都知佢哋做官唔知，搵鬼信。