【再為人父】湊仔唔靠工人 應昌佑自幼缺父愛 學做好爸爸
應昌佑父親節應嘉軒
應昌佑(Charles)都算係新手爹哋,囝囝應嘉軒(Travis)已經三歲半,今個父親節,佢就會再做老竇,B女隨時出世,湊夠一個「好」字。
Charles日前就帶Travis去整Pizza,夾手整一個笑臉心形Pizza,Travis就全程搞搞震,搓粉團時不斷幫爹哋加粉,同拎麵粉整到老竇變花面貓就淘氣,兩父子打成一片。
Charles做訪問時,Travis一時又要唱歌,一時坐唔定,難怪Charles話:「佢好玩,好活躍、好好學,成日問我哋好多問題,好多energy,成日要帶佢『放電』。其實我哋都覺得係一件好事,雖然有時幾難去捉住佢,起碼佢係一個好主動嘅男仔。」
「老師好多讚佢,話佢好細心,會主動care人哋。」
【媽媽係我嘅role model】
Charles小時候父母離異,做人父母呢個角色,他自言尚在揣摩中:「我不嬲都冇一個好深刻嘅『爸爸』印象,媽媽係我嘅role model,但佢都兼顧唔到爸爸嘅嘢,所以自己要去了解點樣去做一個好爸爸,原來係好高深學問。」
同囝囝玩時就好開心,但Charles都試過發脾氣鬧仔,於是Charles就去上堂,向兒童心理學家偷師,了解小朋友心理多啲:「好似早排出現我鬧佢,令佢對我有啲避忌,好似我返到嚟搞佢一輪,佢又扭計唔肯刷牙,我自己又攰,搞到我自己有啲脾氣暴燥唔耐煩,會好大聲喝佢,令到佢會驚同唔鍾意我,成日嗌住媽媽,我就體會到:『我咁做法,係唔係啱呢?』每個細路仔性格都唔一樣,冇話一個方法去治到佢,要慢慢揣摩去應付佢。」
【爭取親子時間:洗白白食飯飯】
有咗小朋友,人生擺位,當然以子女為中心點。「我一放工返嚟,乜嘢時間都係畀晒佢,有時間同佢沖涼,餵佢食飯,同佢玩、瞓覺、刷牙,我好enjoy。我認識好多爸爸,
「佢哋話唔搞,由阿媽同工人搞,我自己覺得佢過咗呢個階段就冇,除非係生多個,唔係就會skip咗,冇得返轉頭,所以要爭取每一刻機會。」
Travis仲細,Charles都開始觀察佢嘅性格,先決定返佢傳統學校定國際學校,他稱:「因為香港教育制度偏向畀好多壓力細路仔,啲爸爸媽媽自然有壓力,對成個家庭都唔係咁好,要自由咁發展,我唔會要佢大嗰一定要做醫生、律師,我完全冇呢樣嘢,到我自己抉擇做呢樣嘢,都係好自由畀我自己揀。我會採取同一個做法。」
【「媽媽個肚咁大,因為有個妹妹喺度」】
另外,Charles已教定Travis要做阿哥錫妹妹:「今次陀呢個,冇第一次咁緊張,但係當然責任會再升一倍,所以我好希望囝囝o依家同妹妹隔三年半左右時間,希望佢慢慢會生性,佢會畀心機一齊去照顧個妹。
「我哋周不時同佢講,媽媽個肚咁大,因為有個妹妹喺度,同佢講要錫妹妹,佢話會,我哋都會灌輸呢樣嘢,希望佢做好哥哥。」
場地:Ciak All Day Italian(太古城中心)
想隨時獲得更多親子資訊,快啲like Easy PaMa Facebook啦!
https://goo.gl/1qWM8g
Travis好活潑,整Pizza時仲搞到爸爸變咗花面貓。