【李八方online】駐港解放軍「顏值爆棚」 操練仲會「燃爆荷爾蒙」?
解放軍駐港部隊新浪微博解放軍
解放軍駐港部隊官方微博帳號,今日獲新浪微博正式「加V」認證。
近年極度重視公關形象嘅解放軍駐港部隊,又有新搞作!據知佢哋個官方微博帳號,今日獲新浪微博正式「加V」認證,原本個名為「HONGKONG捍衛」,下午又改返「駐香港部隊」,中午發出首條帖文,片文並茂咁介紹駐港部隊嘅情況。呢條一分鐘短片中,駐港部隊形容自己係「特別講政治」、「高度重使命」、「嚴格守法紀」,仲話官兵明明「顏值爆棚」,可以「靠臉吃飯」,但都因為「職責與精神」,要做香港嘅「定海神針」,嘩嘩嘩,有冇肉麻到打冷震。
文字介紹亦貫徹「為你我受冷風吹」作風,形容微博內有駐香港部隊官兵「燃爆荷爾蒙」嘅軍事訓練,「軍味泥土味」十足嘅日常活動,仲話官兵都係顏值爆棚嘅「小哥哥、小姐姐」添!之不過打冷震之餘,八方都好關注,究竟呢班官兵「顏值」如何?「燃爆荷爾蒙」後又有幾咁「科」?有片有真相,八方只能勸大家,絕對唔好抱有期望,似乎喺「顏值」方面,同駐軍中人有好大落差。
而為咗爭取關注,駐港部隊微博仲搞咗個活動,話只要轉發微博並標籤三人,就可以參加抽獎,有機會獲得坦克模型或駐港部隊軍營開放日活動紀念帽。