中渝置地（1224）受惠西部大開發，加埋本身土儲豐厚，NAV增值潛力好吸引。中渝最新NAV每股4.6元，現價（3.31元）折讓得28%，睇落冇乜料到。但實情係，中渝家陣喺祖國土儲高達9100萬平方呎（呎價成本唔夠200蚊），土儲充足之餘，兼且集中喺四川及重慶，受惠祖國增長同時，亦食正西部大開發，土儲增值潛力梗睇高一線。
單係今年頭7個月，中渝喺祖國預售樓盤銷售額高達30億銀，按年大增近2.5倍。隨住呢批樓盤明年開始陸續入賬，中渝業績肯定靚爆鏡。
又計計數，以中渝土儲每方呎中線係咁意增值10蚊計，額外增值高達9億銀。重秤中渝NAV每股到8蚊，實際折讓挨近60%，呢轉博中渝折讓收窄到40%，見4.80元，現價潛在回報率45%。

民豐大折讓博升20%

民豐控股（279）啱啱公佈咗2009/10年度（3月底年結）業績，虧轉盈賺2.97億銀，已經無後顧之憂。再講，呢期民豐搞配股，引入大摩前高層廖駿倫，有大孖沙投資者入股，自不然對民豐係咪有新業務搞作，會有憧憬。就算撇除呢個可能，民豐最新NAV每股3.16元，現價（0.385元）折讓高達88%，吸引到痹。呢轉博民豐升20%到0.46元，折讓仲係企喺85%水位。
錢雋