港股連彈第三日，一舉收復50天線及大時代高位，上星期還是一片愁雲慘霧，如今又變回歌舞昇平，彷彿跌市從來未發生。

究竟係調整完成定係彈完再散，可從一個關鍵位找到答案︰恒指今年三度調整，稍微跌穿50天線後即見底再上，中獎率100%，今次若成功企穩該水平（約28786點），有望歷史重演。

樂觀假設股市屬調整，即又係汰弱留強之時，縱觀呢幾日走勢，核心持倉騰訊（700）及平保（2318）依然強勢，故隨即補回大部份之前被震走嘅貨。剛染藍嘅舜宇（2382）弱過藥煲，令人失望，故已全線清走，友邦（1299）尚算硬淨，但未見炒作催化劑，同樣決定不補回。

套回資金主力換馬兩隻藍籌——滙控（005）及領展（823）。

前者上周獲平保增持至超過5%，似乎信心十足，只要呢條大水喉繼續掃貨，對股價承托力，隨時較回購盤更大，加上股息率依然有5厘，攻守兼備！後者以超高溢價出售17個商場，成功以幾何級數提升價值，好戲應陸續有來；另一方面，雖然股價貼近新高，但上月底以來回購手影從不間斷，意味公司認為現價依然超值。一句到尾，兩個頂級前鋒配以兩大高質後衞，地上最強也！

唐牛fb專頁
www.fb.com/tongcow88