韋甘比前晚喺英乙爆大冷作客贏二哥普利茅夫1:0，佢哋嘅後備門將巴利李察遜成為咗焦點人物。巴利李察遜已46歲，門將嚟講唔算好老，但重點係佢有成11年冇喺正式比賽落場。雖然係咁，佢仲係寶刀未老，喺15分鐘入替傷出嘅阿歷士連治之後，力保清白之身，協助球隊從普利茅夫贏波而回。普利茅夫今季喺聯賽主場未試過冇波入，睇嚟巴利李察遜真係有料到。