【咁大膽?】《福祿壽》繼續巡迴唱 祖藍想幫囝囝改名「王思祥」
王祖藍阮兆祥李思捷福祿壽十周年演唱會
噚晚《福祿壽十周年演唱會》頭場,完騷後王祖藍、李思捷同阮兆祥一齊接受訪問,祖藍透露噚日早上7點喺維也納拍完大陸節目趕返港,真係辛苦晒!
提到臨近尾聲時,祖藍同祥仔眼濕濕,思捷話:「我都想,見佢哋咁嘅樣,但一喊收唔到科,所以即刻啜番啲眼淚落去,然後同大家講,不如攬攬啦。」三人百感交集,記者問下次開騷快啲,定祖藍生小朋友快啲?祥仔透露會繼續做巡唱,祖藍搞笑話可以雙喜臨門,仲諗埋阿仔個名:「生仔就叫王思祥、王福祿或王祿壽,不過我講啫,老婆唔會俾我改呢啲名。」
另外,三人都很感謝前輩支持,關菊英、李司棋、梁家輝等一口答應嚟做嘉賓。提到有歌詞諷刺財政預算案,祥仔話:「我哋係改到開騷前一晚都改緊,集合大家心聲去改。(貼近民意?)呢啲係觀眾心聲,相信大家喜歡福祿壽,都係想聽一啲心底說話。」
精選娛聞,喺晒《娛果》
http://fb.com/appledailyent
阮兆祥臉上充滿汗水與淚水,三子最後攬攬以示兄弟情。(仇志德)