我本來應該介紹雜誌或好書，但今次我好希望藉住此欄介紹一個節目，就係無綫嘅《向世界出發》。中國人有一句話：「讀萬卷書不如行萬里路」，做人應該要放眼世界，當你見識更多就會明白「人生何價？」喺現在物質充裕嘅年代，好多香港人都誤會咗以為只要有錢去旅行，愈去得多地方就愈叻，在朋友面前耀武揚威一番就係有見識。但係又有幾多人明白萬里路嘅真正意義？

起初知道無綫有這個節目都有興趣留意，一心諗住係一個旅遊特輯，難得可以看到一些平時去旅行未必有機會體驗到嘅地方，如果咁啱喺屋企都會睇。點知幸運地真係俾我睇到星期一嘅第一集，而第一集就係將會播映的8輯預告片精華，估唔到短短30分鐘嘅片段已經令我體會甚深。首先欣賞嘅係無綫選人到世界不同角落都用得其所，其次係旁白韋家晴一把磁性嘅聲音字字發人深省，令人立即體會人生嘅渺小，細心學習「知足常樂」，讓人真正思考「身在福中不知福」嘅處境及8個人生必須面對嘅問題。一個令你重新改變人生價值觀嘅節目，係無綫值得一讚嘅佳作。可能做人永遠都知易行難，但總好過連這個知嘅機會都錯過，重新想想你的人生吧！朋友！

《向世界出發》
逢星期一至五晚