史篤城禮拜六喺英超作客史丹福橋鬥車路士，最終喺領隊曉士因為輪換作出六個調動嘅情況下慘吞五蛋，呢位威爾斯主帥賽後為自己嘅決定辯護，強調球隊「根本無咁嘅能力同車仔鍊過」。曉士嘅呢番說話，可能係直接講出咗英超唔少中下游球隊嘅悲歌！

曉士今場作出咗大幅度輪換，正選陣容當中甚至包括兩位只係得18歲嘅後生仔愛德華斯同埋泰蒙。曉士承認今場波收起祖阿倫同埋高治等主力，係要留返喺元旦日返主場同紐卡素搏命：「我哋唔多夠人用，根本無足夠嘅資源去同車路士撼過。球隊今日要踢，元旦又有比賽，我哋喺重要嘅位置又有傷兵，後防線四位球員未夾過，包括一對年輕嘅左、右閘。佢哋覺得好難踢，我明㗎，呢個改變真係太大，佢哋係會犯錯，喺呢個水平嘅比賽就會受到懲罰。」

曉士繼續話：「我哋一定要確保球隊喺元旦日嘅比賽係OK，對紐卡素係一場大波，如果我哋全取三分，即係話喺聖誕新年快車檔期拎到兩勝一和，呢個係好好嘅回報。我哋嘅排陣可能會俾人批評，但有時候你係要務實一啲，有時候你係要做一啲其他人唔敢做嘅決定，我嘅決定係要嘗試，同埋保護我嘅核心球員。」

--------------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM