徐子淇再為千億李家誕下男嬰，老爺李兆基(四叔)自是高興不已，除了豪派1,500萬利是予恒基員工外，據悉亦將為囝囝建熹舉行大型百日宴，詳情未定。另李家今日已馬上派薑醋俾城中好友，包括徐子淇專用化妝師GaryChung、鄭紹康同歐陽妙芝等等。根據傳統，通常孕婦都係喺產後12日先至派薑醋，所以推測應該係上月25、26號左右生B。

之不過，今胎都係開刀生嘅徐子淇，因為哮喘關係，故一如之前三胎一樣，都係唔會餵人奶。不過亦有網民驚歎生B一個星期多啲嘅徐子淇已然容光煥發，亦不見水腫，果真得天獨厚。

另外，四叔更想為乖孫打造安樂窩，早前已將2010年以天價18.2億元，買下的山頂白加道35號地皮，用來興建三幢、各一萬呎的三層高獨立別墅。今日記者到地盤視察，工人正冒雨趕工，別墅的地基已經打好，並建了三層高鐵架準備落石屎，如果進度理想，預計明年可以入伙。