【人誰無過?】莫雷拉錯在 今季經常做錯決定!
莫雷拉阿Joe做錯決定頭馬數字
國際賽告一段落,無論人馬都大打真軍,馬迷都睇到啲外籍大師傅,要去馬時嘅取位同推騎有幾犀利,同冇心搏時簡直就係兩個樣。
其實競賽小組都應搵番國際賽同騎師錦標賽呢兩個賽日啲騎師表現做藍本,用作以後監察騎師時做比較,問吓佢哋點解間歇會騎到手軟腳軟。
莫雷拉喺國際賽日(10日)起孖,但四場大賽食白果之餘,「當家精選」同「四季旺」兩隻大熱門嘅發揮,更加受馬迷批評。
「馬克羅斯」換潘頓贏馬,莫雷拉揀錯馬固然無癮,對比上次佢騎到隻馬兩頭片,更加係高下立見。
今季莫雷拉不停贏馬嘅氣勢大幅放緩,唔再好似過去兩季贏馬食菜咁食,交白卷或日行一善就經常發生。無疑佢長駐香港後破盡紀錄,令人覺得能人所不能,更加將佢神化做雷神。
莫雷拉今季頭馬數字跌咗咁多,有好多客觀因素影響,佢自己亦有責任,咁多好多馬揀騎,但好多時都做錯決定。
莫雷拉絕對熟悉兩個馬場嘅跑道同偏差,但佢今季陣上嘅走位,就經常出現走內檔塞車、或者走外檔錯誤判斷發力時機,短兵相接鬥輸嘅鏡頭,呢啲錯誤過去唔會喺佢身上出現。
馬迷覺得莫雷拉今季表現唔妥,但馬迷同競賽小組只可以提出質疑,並冇真憑實據證明莫雷拉鬥志有問題,只可以歸咎莫雷拉近排手風唔順。
跑馬涉及天文數字嘅彩池,賭博就係偏門,好多嘢冇得理性解釋,正如馬場冇可能俾一個騎師玩晒。即使莫雷拉騎功係高啲,總會好似有啲無形壓力,唔會次次都係佢贏幾場威晒。
燦爛過後總係歸於平淡,莫雷拉唔係真係神,馬迷真金白銀投注,幾時都要記住唔好盲目捧人。