大陸女星范冰冰捲入「陰陽合同」逃稅風波後，「神隱」超過三個月，惹來好多唔同揣測。至今月16日生日當日，先被發現喺微博上線，删除一條系統自動發佈嘅「生日快樂」post。

范冰冰行蹤成謎，不過已經超過一個月冇出post嘅「范冰冰工作室」，今日中午突然出post轉發咗由「愛裡的心」發出、講述該會成立9年以來，令339個心臟重獲新生嘅文章，並寫住「世界心臟日，一起關愛心臟健康！#愛裡的心#339顆心臟，339個希望。九年，『心』路仍在前行，任重道遠；十年，揮手而來，願為之更加努力。」而「愛裡的心」，亦正正係由范冰冰及陳礪志共同發起，主要針對貧困地區有先天性心臟病兒童嘅慈善項目。

而神隱前嘅范冰冰，亦曾講過自己做「愛裡的心」嘅理念就係「救一個，是一個，這樣最實際。」而佢當時指會將呢個項目一直做落去。的確，就算冰冰神隱期間，「愛」都仍然繼續運作。

至於今日突然出post嘅「范冰冰工作室」微博，佢喺微博嘅背景資料「乾乾淨淨」——乜都冇，一間公司名都冇提到，而網站中嘅基本信息亦被刪走，除此之外，仲發現而其中嘅「行業類別」，更被改成「粉絲團-粉絲會」，頗為奇怪。

早前大陸有傳媒指冰冰神隱後，連佢位於無錫嘅工作室辦事處亦人去樓空，不過轉頭又話其實只係清潔地毯，所以要搬走物品。翻查資料，同范冰冰有關嘅公司並唔止得一間，除咗喺無錫、俾人話人去樓空嘅「無錫愛美神影視文化有限公司」、「無錫美濤佳藝影視文化工作室」、「無錫唐德文化傳媒有限公司」，仲有「美濤佳藝（上海）影視文化工作室」、「北京美麗宮文化交流有限公司」等共12間。

雖然范冰冰繼續神隱，但正喺美國拍緊劇嘅男友李晨，前晚就打電話俾好朋友呂建民報平安，而呂更話會「小酒恭候」李晨，暗示李晨即將收工返大陸（相關新聞： https://bit.ly/2xXGpYb ）。

精選娛聞，喺晒《娛果》
http://fb.com/appledailyent