麥明詩（Louisa）今日喺灣仔出席活動，講到日前港姐面試，佢話都有留意，講到發現其中一位候選佳麗杜芷綾（Zoe）同Louisa係認識，佢話：「Zoe係我之前讀演技班嘅同學，佢參選前都有問我意見，我覺得佢好有潛質，亦有同佢講參選港姐的確係其中一個途徑，亦都會得到好多機會。」嗱，上年Louisa嘅老友張寶兒拎到友誼小姐，唔知杜芷綾會唔會再進一步呢？

提到今年有佳麗被指整容，「間尺鼻」活現，尤其係25歲嘅Angelica令人印象深刻（新聞連結： http://bit.ly/2rJSxru ），Louisa話：「都唔係好似，邊有間尺咁長？」咁間尺都有長短㗎，佢話：「咁佢（個鼻）都有啲起伏嘅，而且呢一行總係想自己更加出色，尤其是公司咁多靚女。」

另外，有多年未見嘅外籍佳麗參加，Louisa話係好事：「香港係一個國際城市，有外國或少數族裔參加係好，大家應該Open Mind。」至於有指今年港姐會取消全民投票？Louisa話：「呢啲咁高層嘅嘢我唔清楚，但我覺得作為觀眾有得投票係吸引嘅，始終受眾嘅都係香港市民。」