當年今日

求驗客手記:2.3億年薪日職最高
小白下一站︰神戶

蘋果日報 2018/05/25 05:20

足球普多斯基體育日職恩尼斯達神戶勝利船

啱啱離開巴塞隆拿嘅恩尼斯達,終於落實下一站嘅目的地,呢位34歲西班牙國腳決定嚟亞洲踢波,禮拜四正式加盟日職嘅神戶勝利船,據講佢年薪有成2,500萬歐元(約2.3億港元)!
近期勝利船班主兼樂天CEO三木谷浩史已經成日放風,暗示恩尼斯達會加盟㗎喇,周四上晝佢仲喺社交網站上載咗同小白喺私人飛機上嘅合照,搞到同日下晝嘅記者會都冇晒驚喜。佢喺記者會上面就宣佈小白落實加盟,仲話希望小白可以將巴塞足球嘅DNA帶到日本,幫助勝利船成為亞洲第一球隊,並且為整個亞洲球壇帶嚟影響咁話。

望推動日本足球進步

而恩尼斯達喺三木谷浩史演講完之後就終於登場,仲即場進行簽約儀式。雖然勝利船就冇公佈今次用咗幾錢請呢位西班牙球星加盟,不過唔少日本傳媒都話,小白今次嘅三年合約,每年有高達2,500萬歐元人工,當然係日職史上最高嘅球員啦,所以小白唔使去中超都照樣搵到盆滿鉢滿。
恩尼斯達就非常識做,即場講番兩句冧吓日本球迷:「我一直都有留意日職同日本國家隊嘅比賽,日本嘅球員技術水平非常高。今次加盟,我希望可以幫助神戶勝利船以至日本足球一齊進步。」小白仲話非常期待喺日本展開新生活㖭。小白將會喺星期六喺神戶勝利船主場同球迷見面。
喺記者會上面,三木谷浩史同恩尼斯達就一齊舉起神戶勝利船嘅8號波衫,不過其實呢個號碼𠵱家已經名花有主,畀正選中場三田啟貴着緊,而日職亦都有條例講明,球員嘅波衫冧巴唔可以喺季中更換,唔通勝利船想賣走三田啟貴?神戶嘅發言人就話,其實恩尼斯達嘅號碼仲未決定嘅,只不過佢喺巴塞着開8號,所以記者會先整住件8號嘅箒,各位粉絲都係睇定啲先,唔好咁快印8號住喇!
嚟緊小白就會喺神戶拍住德國前鋒普多斯基一齊上,呢對中前場嘅豪華組合認真令人期待。雖然神戶𠵱家只係喺日職排第六,不過周四宣佈咗小白加盟嘅消息之後,馬會即刻將佢嘅奪標賠率調整到20倍,唔知大家又會唔會買番少少支持吓呢?