世界盃，四年一次的盛事，如果並非世界盃揭幕戰前一日，北美聯盟（美國、加拿大、墨西哥）以壓倒性姿態奪得2026年世界盃主辦權，其實唔係好關加拿大事，談論的空間絕不及美國總統特朗普同加拿大總理杜魯多之間的G7口水戰以及連帶的貿易戰，因為早前美國加息，加紙即跌半年新低。

首次由三個國家聯合主辦，領土之廣比起今屆戰鬥民族的俄羅斯仲要勁，而2026年的世界盃，更加會破天荒決賽週加至48隊，務求足球盛事化，加拿大人係咪普天同慶呢？至少溫哥華唔係，因為溫哥華早於北美聯盟落標之前已經宣布唔玩世界盃，所以2026世界盃的賽事，加拿大只係由另外三個城市包括多倫多、蒙特利爾同愛蒙頓舉行。

因乜解究有世界盃都唔玩呢？話晒2010年冬奧運同2015年加拿大主辦的女子世界盃，幫溫哥華打響名堂兼有實際效益，先講冬奧運，除比賽收益以外，當年用冬奧運呢張牌擴建的鐵路線「加拿大線」，2009年開通，本來市政府預計要兩年先可以達到每日10萬人次的流量，結果未夠一年已達標，然後沿線的發展，市政府分三期規劃，頭兩期已經完成，將城市核心地帶的人口利用鐵路沿線伸延，提高住屋供應量，更帶動埋樓市暢旺，而本來沿線預留的三個車站，其中一個站，溫哥華市政府同發展商合作，以發展商及新樓花的買家共同負擔興建車站開支，市政府唔駛出錢，本來估算要用15年籌期，結果提早9年完成，原本出入的市民搭車唔駛額外俾錢，政府唔駛俾錢，買樓賣樓貪鐵路概念的就自己出錢興建，一石三鳥。

而2015年的女子世界盃，溫哥華舉辦了9場賽事，包括決賽。據市政府文件所講，當年平均每場賽事的經濟效益達8,000萬加紙，而成本是5,000萬加紙，除笨有精，無論賽事收益以及城市經濟都有正面回報，美職聯的溫哥華白浪個主場本身都可以容納超過五萬人，交通完善，大型賽事經驗豐富，夠晒規格，做乜今次唔肯申請搞世界盃呢？講到尾都係怕埋單條數。

時任卑詩省長賀瑾(John Horgan）表明不想為國際足協開一張空白支票。並指出國際足協對於搞世界盃要駛幾多錢並無提供一個概念。一盤生意要投資幾多完全唔知，你肯唔肯？

首先，睇番近兩屆的往績，2010南非世界盃，事過八年，Cape Town Stadium雖然獲當地兩支足球隊與及欖球隊租用，但仍然入不敷支，演唱會一年比一年少，國際友誼賽八年來只有南非對曼聯和美國可以入座超過9成，其餘入場人數得100人都試過，慘不忍睹。而且每年還要耗費過百萬美元的維修費，前年更有當地組織團體建議政府「炸咗佢」，Cape Town Stadium直到今日仍是南非的政治問題。而2014年巴西世界盃情況更差，30億美金興建同翻新12個場館，一年未夠，漏水關閉、大巴停車場、沒有職業球隊駐場等問題，加上當中10個球場工程涉及貪污，困擾整個國家。

第二，國際足協交唔出條數都係應該，因為8年後先舉行的世界盃成本可以相差幾遠呢？就以溫哥華市政府文件顯示，2010年冬奧運時，申辦成功時的保安預算是1億4千幾萬加紙，但最後埋單是9億有多。港珠澳大橋同高鐵的造價，都唔係未聽過，即使溫哥華低陸平原準備籌劃輕鐵，造價都由原先規劃的1億幾加紙，預計完工後都會上漲至4億幾。

第三，北美聯盟三個國家有23個城市（加拿大3個、美國17個、墨西哥3個）申辦參與世界盃期間的80場賽事，但最終只有16個城市可以主辦，即係今次中標之後，城市之間仲要爭多一次，而且八強之後的賽事全部美國舉行，而加拿大只會舉辦10場賽事，而且分組賽為主。分組賽加至48隊，良莠不齊，8年後萬一歐洲小國列支敦士登成功打入世界盃，興奮到舉國上下湧入加拿大睇世界盃，都係得3萬幾人，球場都坐唔爆，點算？

對於有經驗的城市，有時就唔似得北京搞奧運、卡塔爾為世界盃都起冷氣場館咁不惜工本好大喜功，製造軟實力，寧可認真望望盤數，1976年加拿大蒙特利爾奧運會，蝕到入肉，還錢還足三十年。
至於話2015年女子世界盃有錢落袋，但都要多得美國一口氣殺入決賽，美加兩地相依，球迷自駕遊都可以前往觀看，球迷自然多，但世界盃，美國隊本土作賽，無需出征，假如分組賽中國隊入到世界盃（雖然無乜可能）就話多球迷，萬一48隊當中，非洲或歐洲小國的球迷，又是否可以坐滿球場，翻看歷年世界盃分組賽早有定論。

世界盃是一時，體育資源投放才是永恆，8年後的足球世界係點，對於一個並非以足球為主的城市來說，舉辦世界盃是一場大賭博，既然如此，唯有講句睇波不賭波，睇波樂趣多。
＿

作者 : 龍華琛，現居溫哥華，做住加男人。曾任多間傳媒機構，寫稿、創作、編劇、主持一腳踢。