民主黨劉慧卿離開議會後，生活相當多姿多彩，卿姐除咗不時搵人食飯聚舊之外，佢仲係政圈好活躍，除咗網台節目《議會內外》長做長有外，尋日卿姐仲係fb上載佢26年前當選立會議員舊相，另外八方仲聽聞，卿姐仲請奶媽特首林鄭月娥做嘉賓，如果成事的話，呢次將會係卿姐首度訪問在任特首。

原來尋日對卿姐嚟講亦係相當有意義嘅一日，因為26年前、即係1991年，香港舉行咗第1次嘅立法局地區直選，當年卿姐首次落場就成功當選，成為唯一一位直選出身嘅女議員，自此之後，卿姐更未嚐敗仗，連續做咗7屆議員，絕對係一個輝煌嘅紀錄，所以卿姐噚日特別係fb上載幾張當年選舉嘅舊相，紀念呢個咁特別日子。

不過卿姐唔再做議員，唔代表佢淡出政圈，佢做網台政治節目仲愈做愈開心，卿姐尋日同八方證實，佢前排邀請過林鄭上《議會內外》，林鄭並無拒絕，仲話OK呀，只係遲啲先。到上個星期，卿姐再短信追吓林鄭幾時有時間，但就未有回應。

嗱﹗林鄭係咪有心修補撕裂就睇佢係咪得把口喇，事關卿姐喺前朝梁振英做緊特首嘅時候都請過梁振英，只係梁振英一直冇回音而冇成事。今次卿姐又畀張好牌林鄭上，係龍係鳳就睇林鄭自己喇﹗