世界一級方程式（F1）中國站賽事前日喺上海舉行，劉嘉玲應大會邀請去咗上海國際賽車場體驗賽事，更加喺52個圈賽事後負責揮動方格旗。原來佢將會同退役嘅F1冠軍車手Mario Andretti同現役嘅F1冠軍車手艾朗素（Fernando Alonso）一齊喺賽事結束後，喺上海合作拍一條宣傳短片。

時速270公里

嘉玲話：「嚟緊我同Mario Andretti同Fernando Alonso合作拍一個video，但係乜嘢類型嘅video，𠵱家唔講得住，適當時候會同大家講。今次有機會嚟睇賽事，52個圈跑完，佢哋又將揮格仔旗嘅任務交畀我做，我覺得好榮幸！」而艾朗素喺比賽前載埋嘉玲喺跑道兜咗一個圈，嘉玲話：「佢平時係開時速350公里比賽，車我時佢已經減到270公里，但我都感受到好快！好過癮！呢啲係車隊與車隊、高科技與高科技嘅較量，同埋所有嘢都係好嚴肅，好講團隊合作精神。最令我難忘係睇到咁精采嘅賽事，我喺現場好享受賽車聲、電油味，仲有車胎喺地下擦出嘅味道，真係好鬼難忘！」
撰文：馮仁昭