第十屆亞洲電影大獎頒獎禮昨今晚喺澳門威尼斯人酒店舉行，下午5點，眾星開始行紅地毯，太陽娛樂老闆周焯華、羅霖偕兒子、甄子丹胞妹甄子青、張敬軒、王菀之、白只、春夏、翁子光、梁詠琪、菲律賓男星JohnArcilla偕家人、韓國女星李成敏就身穿白喱士吊帶谷胸現身，相當性感，佢會同Soler一齊擔任大會司儀，眾女星之中，以莊端兒著嘅低胸裝最為性感。

張敬軒同王菀之手牽手到場，婚後嘅王菀之心廣體胖，孕味甚濃，佢同軒仔走紅地毯時，軒仔係小心奕奕咁扶住佢。事後記者問佢係咪有身孕，佢否認：「唔係！只不過過年期間食多咗糕點，生仔係好正常事，但呢啲冇得急，要順其自然。」而白只憑《踏血尋梅》獲最佳男配角提名，佢就表示：「今次有幸出席如此盛大頒獎禮，心情相當緊張。」在旁嘅翁子光爆白只料：「原來佢係淺野忠信粉絲！我話俾佢聽今晚有可能有機會見到偶像！」白只點頭承認話：「如果一陣真係見到佢，我會企喺一邊，默默支持佢。」

身穿黑色晚裝嘅梁詠琪今晚應邀擔任頒獎嘉賓，有記者問笑佢衣著太密實！佢哈哈笑話：「係呀！做咗媽咪就要以身作則，唔可以咁性感啦！」近期佢一直喺澳門拍電影《骨妹》，戲中就係演骨妹，雖然喺澳門拍攝超過一個月，但因為掛念女兒，有時收工會搭夜船回港，到翌日朝早先會搭早船返澳門開工。