個個打工仔都想早早搵夠上岸退休，但係冇乜邊幾份工可以畀你晨早搵夠印印腳。做投資銀行似乎個個都賺到盤滿缽滿，但一來只限於嗰啲超級美資大行，local嗰啲小型舖頭投行都唔係咁好搵；二來，嗰啲美資大行門大主人惡，要入行，除非你係一流大學MBA，又或者老竇有頭有面。如果條命水有咁好，都冇所謂上唔上岸。所以話，打工仔都諗唔到咁長遠。
不過，我阿利最近睇嚟，入大行做會計師都不失為一行有本事搵夠上岸嘅行業。淨係我側邊嗰班老嘢，個個退休都係打打波，做吓公職，都唔知幾梳乎。

入大行保下半世

我咁寫，實俾人鬧幫大行做宣傳，引啲𡃁仔入行。咪嘈住，聽埋先。嗱，如果入得大行，捱到升老闆，坐得十五六年唔俾人踢走，自己又唔大使，五十零歲退休時總有幾千個擲袋。有咁嘅身家，食多三幾十年穀種應該冇問題。況且𠵱家大行升老闆容易咗，唔學得我阿利嗰個年代，要有幾個鬼頭睇住先有得上。總之，你捱得，做得，包你下半世無憂。
當然，升老闆前嗰十年，實捱到你金睛火眼，通宵達旦、冇熱水沖涼、食埋啲油膩垃圾、受白癡老闆氣、受無知客戶氣，呢啲嘢行行都有，少少皮肉之苦難免。捱得過呢十年，冇用皮甩骨，抵你退休後可以有安樂茶飯食。
仲有，如果退休後你寂寞難耐，分分鐘可以搵番一個半個公職做吓，回饋吓社會，唔使日日打波咁悶。做做吓，話唔定可以發展另一項事業第二春。
所以話，後生仔要計劃將來，可以試吓呢行。我愈來愈見得多四五十歲，正當盛年嘅老闆退休。以佢哋嘅經驗背景，出番嚟搵番份工做都仲得。