第五十屆金馬像頒獎典禮各大獎項塵埃落定，章子怡憑《一代宗師》「宮二」一角，成功壓倒杜綸鎂﹑鄭秀文﹑舒淇及顏卓靈，從劉德華及張曼玉手中取過影后獎座。

今午子怡喺微博留下感謝語句：「就讓這一切像一張老唱片，慢慢旋轉着，聲音從唱針那一頭悠悠地飄過來，帶着過去日子的心思和故事，也帶着心靈的温度迎接新的開始。感恩！謝謝所有人的祝福，我已將它們深埋心底！」

雖然章子怡喺最佳女主角呢個獎，表面看似十拿九穩，惟據台灣媒體報道，子怡嘅影后之爭並非外界般預期輕鬆，雖然一直係最高票，但其實都冇過半數，要喺第三輪投票中，先後贏咗舒淇《西遊‧降魔篇》及鄭秀文《盲探》才勝出。據金馬評審團主席李安透露，《一代宗師》本身就比另外兩部戲好太多，而片中章子怡喺長久壓抑後，向梁朝偉吐心聲「我心裡有過你」呢場戲，被李安形容為「交貨了」，成為全片成敗關鍵﹗

另外，除咗以上五位女演員外，李安亦特別提及，喺《爸媽不在家》中飾演菲傭嘅安潔莉芭雅妮，以及喺《殭屍》飾演梅姨嘅鮑起靜，其實都具威脅實力，可惜佢兩個未能入圍。

至於女配角方面，李安就話《爸媽》女配角楊雁雁，亦因為部戲本身太強，經過一輪投票後，就已經以壓倒性票數贏咗第二位嘅林美秀。