江若琳今年公開咗同「生煎王」蕭潤邦（Oscar）拍拖後，兩人不時喺網上公開放閃，今日係江若琳29+1，即係30歲嘅生日，身為男友嘅Oscar，當然悉心安排呢個拍拖後第一個兼且係轉3字頭嘅生日。佢哋一連去咗上海同布吉旅行，今日凌晨，佢哋貼咗喺布吉倒數切蛋糕嘅相，友人都送like同送祝福。

江若琳先喺fb貼咗泳衣相兼留言話：「我宣布，我告別2字頭啦！再見啦青春無敵！」過咗冇耐，再貼咗喺海邊燭光晚餐嘅sweet相，佢話：「好啦，踏入3字頭啦！多謝所有朋友仔嘅祝福！今年我過得好開心好快樂，我相信30歲後嘅人生一定會更精彩，其實人生追追趕趕，最後都唔及得有愛嘅人係自己身邊，家人朋友平安健康就係最大嘅福氣啦！其他嘢何必介懷呢，開心先係最緊要！#女人3年頭有咩好怕喎#見盡風浪先叫人生。」言語間feel到佢遇上「生煎王」非常感恩！

Oscar亦有分享女友嘅post兼話：「Happy birthday蘋果（對江若琳暱稱）！三字頭喇！幾好呀！同聲同氣！不過無論你三四五六七八九字頭！我都會好好照顧你架！邊個再蝦你，我幫你搓麵粉咁搓扁佢！love u！好！講得好！飲！」