反修例運動今日（12日）正值一周年，民間集會團隊連同各區區議員，於全港擺設6.12抗爭展覽街站，各區市民無懼惡法上街參與街站，於晚上8時亮起手機燈光，合唱《願榮光歸香港》。

前來參觀銅鑼灣街站展覽的小江（化名）指由去年6月9號一百萬人上街反送中，至今政府完全漠視民意，「政府到so called撤回逃犯條例，而家又加多一個國安法。」她又表示國際戰線由去年6月9日早已開始，全世界都一直關注着香港，「全世界可能暫時都聚焦於美國嘅黑人運動，但香港人唔可以放棄」，她寄語香港人不要放棄，要繼續向世界發聲，繼續走上街頭。

另一名參觀展覽的市民鄧先生直言，7·21元朗白衣人事件「打破咗自己道德規範，完全冇諗過政府要用到呢啲招」，鄧先生表示政府要用到如此下三濫的手法去打壓市民，令他失望至極。他又鼓勵現時正流亡海外的抗爭運動人士，要等待最好的時機，運動不會完結，「唔好放棄，會有黎明來到嘅一日」。

另一名參觀展覽的廖小姐則指即使香港政府與中共政府不斷打壓市民，都仍會走上街頭抗爭，「幾失望都好，唔會離開香港」。

「我哋香港人無做錯，點解要離開？」

灣仔同樣設有6.12抗爭展覽街站，有專程參觀街站文宣的郭小姐指，要支持製作6.12文宣的抗爭者，「事實嘅嘢要支持」，她指「無諗過出嚟賞展（觀賞文宣街站）都咁（有風險），有少少荒謬」。她表示不打算離開香港，「我哋香港人無做錯，點解要離開？」

去年4月已開始參與反送中運動的張小姐指，過去一年的抗爭展示出香港人前所未有嘅精神，包括黃色經濟圈等，令人驚嘆，「一年前出嚟（遊行）係輕鬆，但依家就有風險」。張指自己有意移民，但她認為「對嗰啲為呢場抗爭做咗最大努力嘅人嚟講，佢哋做咗好多嘢但又唔可以走（移民）」。

反修例後對警方印象「差好遠」
「當市民係仇人」

有份到現場唱歌的馮先生表示，原本也打算參加6.12一周年活動，「政府一年來冇諗過解決問題，所以先更加要出嚟，唔同行業都擔心白色恐怖，已經唔係話最大訴求，你見到中國同香港政府都唔理香港人死活，最想都係同返香港人講，我哋要繼續堅持落去，向呢啲專權專制發聲，我哋會反抗」。

Charles指香港人有責任走出來，爭取和捍衞香港應有的自由和制度，他指最擔心遇上「黑警」，國安法來臨心態上覺得「再唔做就會乜都冇喇喎，唔得都算，但唔做過又好似……總之要全力以赴囉。趁而家國安法未執行，講盡佢囉，唔敢話對未來好樂觀，總之盡力」。

不願上鏡的阿星，去年反修例前還覺得警察友善有良心、會互相打招呼，但反修例後對警方的印象「差好遠」，把市民當仇人。他不滿政府所有政策講一套做一套，尤其是限聚令，高層說「可以點點點」，執法者「亂咁嚟」按喜好捉人，一味找市民麻煩，嚇到市民不敢出來抗議。他指今晚出來，「叫做發洩吓，啲怨氣谷住谷住真係會黐線㗎！政府信唔信，咪佢自己落嚟睇吓囉！嗌咩都好都係發洩咋嘛，如果嗌兩句就成事，政府嗌咗咁多嘢應該掂咗啦？點解又唔掂呢？」

70歲老伯無懼惡法 堅持上街抗爭

70歲的陸先生前往天后參觀6.12抗爭展覽街站，他坦言一幕幕傷痛的回憶使他無法釋懷，「每一幕都歷歷在目，唔會忘記」。國歌法正式生效，但仍無阻陸先生到場高唱「願榮光歸香港」，他堅持唱甚麼歌是他的堅持和自由，不會因惡法生效而卻步。除了國歌法，「港版國安法」和秘密警察的黑影也將籠罩香港，香港的自由恐將進一步收縮。面對惡法，張先生昂然道：「當然驚，每個人都有恐懼，中共都有恐懼，唔係佢都唔使搞咁多嘢。」

過去一年反修例風波雖在19歲的周同學心中烙下一道道傷痛的疤痕，但也使他對香港的歸屬感增加。他又表示，不怕國安條例，因為過往暴動條例都一直存在，但香港人也不曾退縮，「政權越打壓，越要反抗」。他又強調，雖然國際將制裁中共，但「香港人自己都要做嘢」。

一年過去，看到抗爭情緒消退，令23歲的張小姐感到唏噓，她形容政權的壓迫一天比一天嚴重，警察的行動越來越快，又指很多時候人群未聚集便已被捕，令她無力感越來越強和灰心。雖然灰心，但張小姐堅持「雖然擔心，但自己有能力出嚟都會出嚟」。

-----------------------------
反送中一周年，《蘋果》整理大量涉及警察濫暴濫權等資料，製成詳盡資料庫，請按此閱讀圖表版本 ／純文字版本
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
App內1-Click訂閱《蘋果動新聞》
按此了解更多