盧冠廷(LoLo)噚晚喺紅館舉行「BeyondImagination」演唱會尾場,仲請咗劉德華做嘉賓,二人喺台上chit-chat一輪,LoLo就話華仔嘅第一次獻咗俾自己,華仔就答佢:「我第一次寫歌,嗰時好多歌手寫咗歌俾人唱,我就攞咗佢首歌寫咗《如果你是我的傳說》,你哋知唔知幾多年呀,放心,我哋都唔知!」LoLo就同華仔講:「我同你傾過一次偈咋,就係上次賑災,你嗰時仲話就震到嚟香港!」華仔答LoLo話:「依家唔同咗啦,上次未有後代,有咗後代唔會講呢啲嘢!」LoLo答:「你咩意思呀?生咗出嚟死晒唔緊要呀?」華仔即刻笑住講:「唔係唔係,嗰時走就大家一齊走,如果有(後代),就俾佢哋開開心心,唔好講呢啲衰嘢!」
跟住華仔就唱《如果你是我的傳說》,見觀眾反應好,華仔不忘同LoLo講:「最後一句,香港係每日都有好多煩憂嘅地方,所以我哋一定要有個清泉,繼續每年都開,LoLo,只要你每年都開,我每年都嚟!」全場即刻拍爛手掌!
最後,當LoLo唱《陪著你走》時,全場勁high大合唱,唱完之後,LoLo就攬實太太多謝佢。「佢(太太)好恨我多謝佢,咁係應該嘅,我成日都唔記得,好多嘢喺身邊唔值錢,冇咗嗰時就知死啦!」
完騷做訪問時,LoLo劈頭第一句話:「我散晒啦!」跟住就話自己個騷都有mistake,好似入唔到歌咁!問到華仔喺台上嘅地震論,覺唔覺佢因為有咗小朋友而變咗,點知LoLo竟然話唔知華仔有小朋友,仲反問記者係仔定女,當記者答佢係「女」時,LoLo就話,「咁唔怪之得啦,阿Lam(林子祥)有一件出嚟都變晒,愛心真係湧晒出嚟!」
至於唱《最愛是誰》俾啱啱同李麗珍分手嘅潘源良聽,驚唔驚對方觸景傷情,LoLo就笑笑口話:「佢都習慣啦,唱呢首歌,反而我傷心傷感啲囉!」