2015年嘅區議會選舉，傘兵中有人成功搶攤，落敗嘅人士中，部份繼續留喺社區深耕，但世事往往有心未必有力！好似由傘兵「西環三子」劉偉德、伍永德、葉錦龍等牽頭、喺西營盤朝光街地鋪開設嘅「西柚辦公室」，投入服務約年幾，除咗搞活動外，亦會做區內協調工作等，係部份西環友聚腳地，但因為人手同資金不足，做到今個月尾就要停止營運嘞！

本身係西柚辦執委嘅葉錦龍同八方講，家下每個月單係租金已經萬二蚊，仲未計燈油火蠟同活動開支都係由佢哋成員夾份支付；由於月捐計劃同招收會員都唔太理想，加上執委都有正職，佢哋亦冇多餘資金可以請人，無可奈何下唯有結束營運。

雖然西柚辦做唔住，但佢哋仍然希望繼續喺社區工作，以佢自己為例，逢周四都會喺區內設流動辦公室，難怪葉錦龍直指：「總有方法再見。」