糖妹今日喺九龍灣出席「愛海行動嘉年華啟動禮」，糖妹宣揚愛護海洋訊息，仲同一班小朋友大唱洗腦兒歌《Baby Shark》，糖妹笑住表示：「之前都有聽過呢首歌，好簡單歌詞，動作都係今日先學。」

講到保護海洋生態，糖妹話：「好多海洋生物好似海龜，被我哋掟落海嘅膠袋、膠樽整死咗，所以細細個就要知道唔可以掟嘢落海，唔可以當海係大垃圾桶。」糖妹認為小朋友要由細開始，除咗要學德智體群美外，仲要懂得環保。

對於糖妹同吳錫輝主持嘅節目《輝哥為食遊》，佢笑指向來都多師奶粉絲：「個個都想我做新抱，幾唔要面呀；輝哥見識到我幾咁大食，我真係冇浪費，魚、榴槤都係真食，其實我唔食榴槤，有次我食榴槤食到流眼淚，不過都過咗去。」有咩食物真係食唔到？糖妹諗完又諗：「昆蟲都還好，有次喺順德食清炒蚯蚓，好清甜、好新鮮，食到停唔到，人一世物一世，乜都試下。」

精選娛聞，喺晒《娛果》
http://fb.com/appledailyent