【新增內容及圖片】
韓國年度音樂盛事《MAMA音樂頒獎禮》香港場將於聽日喺亞博館舉行，一眾韓星今早就陸續由韓國飛來香港作準備，當中人氣男團防彈少年團（BTS）及Wanna One今早已率先飛抵香港。

而為香港《MAMA》擔任主持嘅男星宋仲基，今早亦由仁川國際機場出發，今日oppa戴上鴨舌帽現身，不時跟粉絲揮手及微笑，望落非常精神。另外，GOT7、金成鈴、鄭麗媛、李善彬、徐玄振等韓星亦相繼出發飛來香港。

約12時半，宋仲基率先步出VIP通道，佢未有戴口罩遮樣，當oppa見到接機粉絲時都有大方揮手及鞠躬，不過未知係咪因為近日要拍新劇，佢手上就未有戴婚戒。

相隔8分鐘後，男團GOT7成員Bam Bam、榮宰及Mark相繼現身，Bam Bam亦有揮手、舉V，隨後其餘兩人就急步上車。而李善彬、安宰賢、韓劇《鬼怪》女星李伊、鄭麗媛、賣座韓片《與神同行》系列男星金東旭亦逐一步出接機大堂，當中安宰賢最親民，仲企定定畀傳媒影相，相當識做。

精選韓流，喺晒《娛果》
http://fb.com/appledailyent