遲熟中長途馬開竅非同小可，這晚（28日）谷草華將吳嘉晉於第七場二班一哩，夥拍師傅告東尼旗下「馬克羅斯」由頭帶到尾，人馬攜手連捷保持谷草合作不敗，今場單Win及組合獨贏A1分別派35及17.5元。

天生栗色一副靚仔馬樣的「馬克羅斯」，於外地九戰五冠一亞一季一殿，包括兩勝一哩表列賽，戰績非常突出。今季抵港初期於1200、1400米表現一般，但季尾開始開竅，上次於本月14日增程跑二班谷草1800米配吳嘉晉，一放到底打開在港勝門，造出1分47秒61，打破谷草1800米全港紀錄時間。

今次「馬克羅斯」跑短150米，孭多上仗15磅，馬主蕭劍新繼續支持吳嘉晉，結果照辦煮碗，沿途放頭跑主動，直路拋離馬群直奔終點贏1.75馬位，大熱連捷於谷草。

蕭劍新近排旺過旺角，「馬克羅斯」贏兩次加埋另一愛駒「澳斯卡」新勝剛周日（25日）三級賽精英盃，蕭劍新前後短短15日內，已三度拉頭馬兼贏大賽。美中不足是其兄蕭劍平的另一東廐馬「勁哥兒」今場後上不及跑第三，未能幫蕭家炮製一條兄弟Q。

蕭劍新說：「今仗『馬克羅斯』縮程跑1650米很成功，吳嘉晉這兩仗發揮也很出色，既然這匹馬由他贏開，我當然會繼續支持他。事實上，我亦希望『馬克羅斯』令吳嘉晉贏出信心，助騎者逐步爭取好成績。」

第七場開出翻版連贏，發叔劉皇發名下「龍船」連續第二仗受制於「馬克羅斯」做二奶。三、四名順序是「勁哥兒」及「金獅叻將」，四重彩派二萬蚊多啲。