【新增動新聞】
巴黎聖日耳門（PSG）喺歐聯開鑼戰就以5:0大炒些路迪，不過隊中貴為世界最高身價球員嘅巴西球星尼馬喺賽後就拒絕同些路迪18歲小將安東尼拉斯頓握手，結果畀網民批評佢冇體育精神，同埋示範咗乜嘢係錢買唔到「卡士」。

今場比賽，拉斯頓負責看管尼馬，經常對尼馬作出硬朗攔截，比賽頭20分鐘已經對尼馬犯咗兩次規同畀球證警告咗一次，而尼馬喺呢場比賽亦多次表現對拉斯頓不滿。

英國《每日郵報》指出，由錄影片段所見，拉斯頓疑似喺PSG領先3:0冇幾耐，尼馬因為插水領到黃牌後正面向住尼馬大笑，尼馬就似乎對拉斯頓講咗啲嘢，再望吓個分牌然後做出示意比數係3:0嘅手勢。完場之後，拉斯頓想同尼馬握手，但尼馬並冇理佢仲做出挑釁表情，又用手掩住個嘴講咗啲嘢刺激到對方，要由隊友馬高華拉堤做和事勸開對方。