「新亨利」繼續發光發熱！周三歐聯8強首回合，摩納哥年僅18歲嘅前鋒基利安洛天個人梅開二度，為球隊搶得作客領先多蒙特3:2嘅優勢之餘，更以18歲113日之齡，成為最年輕喺歐聯淘汰賽階段「起孖」嘅球員！

洛天呢場賽事盡顯過人速度同把握力，17分鐘就靠佢壓入禁區，搏得「蜜蜂」守將柏柏斯達夫普路斯出手拉跌，雖然隊友法賓奴泰華利斯12碼宴客，但洛天兩分鐘後喺越位情況下接應傳中撞入，旁證視若無睹下入球成立！換邊後，洛天未有跌watt迹象，先嚟個人突破再次迫得柏柏斯達夫普路斯鏟低，只係球證網開一面未有將後者驅逐離場，到咗79分鐘，佢再把握比薛斯基誤傳下單騎直進，最終勁射右上角破網，令多蒙特門將路文貝爾基鞭長莫及！

見到洛天咁勁揪，除咗摩納哥開心，法國國家隊球迷一樣咁開心，因為主隊都有20歲法國前鋒奧士文尼迪比利入波，合力締造首場有兩位20歲或以下球員入波嘅歐聯淘汰賽！洛天賽後亦有透露，喺炸彈襲擊隊巴事件後慰問過迪比利：「我嘗試打畀佢，佢向我解釋事發經過，然後我話畀佢聽，我會同佢哋並肩作戰。呢件事令人神傷，但我哋係專業球員，必須適應一切情況，那怕係最極端嘅情況，就好似今日一樣，我哋只能嘗試踢出歐聯8強嘅水準。」