話就話呢次「送中」惡法係特首林鄭月娥一個人而搞到天下大亂，但作為佢身邊嘅問責官員、行會成員，唔通一啲責任都冇咩？梗係唔係啦，其實睇番佢哋嘅利益申報就知道，有啲人口裏讚好、身體卻很誠實。

特區政府喺今年2月中提出修例建議，之後引起軒然大波。若果以2月中為界嘅話，咁有幾位問責班子成員嘅行為都幾可圈可點。

首推嘅係「見過Steve Jobs」嘅創科局局長楊偉雄，佢喺今年2月底，即係政府提出修訂《逃犯條例》建議無幾耐，就將佢5個位於美國嘅住宅放售。大家冇眼花，係5個咁多。不過呢點係要讚一讚楊偉雄夠忠心，明知「送中」惡法殺到埋身都封咗自己後路，賣埋美國層樓，相當勇呀。其他問責司局長就按兵不動，靜觀其變，可能唔想被人有口實啩。

反而行會非官守成員中，之前已經報道過，身兼行會非官守成員嘅經民聯立法會議員林健鋒最誠實，喺4月底、即係13萬人上街反惡法後就將3個位於南區嘅住宅連埋7個車位放售，直到而家都未有再賣樓喇。而另一行會非守官成員羅范椒芬，佢就喺5月初冇再做大唐西市絲路控股投資有限公司嘅獨立非執董。

八方睇過呢間「大唐西市絲路」公司嘅網頁，佢哋介紹自己係一間「推動絲綢之路商貿發展和文化交流為宗旨」嘅公司，「通過整合資源、創新突破、融合發展，不斷創造新的業績」。一句講晒，即係唔知佢做乜囉，總之同一帶一路似乎有關，咁又再令人諗起，特區政府不斷硬推「送中」惡法嘅時候，似乎唔多覺羅范出嚟撐噃，反而到最後階段又幫手放風話暫緩囉。

至於一眾副局、政助方面，絕大部份都好乖，冇乜大改動，只係發展局副局長廖振新，將佢爸爸留畀佢嗰幢村屋連1/6農地業權放售咗。睇落同「送中」又未必好大關係嘅！

-----------------------------
民陣G20「Free Hong Kong」集會
日期：6月26日（三）
地點：愛丁堡廣場
時間：20:00-21:00
-----------------------------
【登記做選民 7月2日截止】

登記方法：
。親身取表填寫及郵遞
。網上登記（可用手機登入，在選舉事務處網頁打開REO-1表格，使用免費手機應用程式Adobe Fill & Sign打開表格，再按指示填寫資料，按儲存文件並以點擊分享，再電郵至 [email protected]）

詳情可參閱選舉事務處網頁：
https://www.reo.gov.hk/ch/voter/gcnr.htm
-----------------------------
7月4日起 《蘋果動新聞》只限升級壹會員閱覽
繼續撐蘋果！
https://hk.adai.ly/e/iIRREmuwDX