谷草素來1檔大晒，但今晚（21日）谷草用C跑道作賽，1檔馬開場後卻冇明顯優勢，直到第七場三班1200米至首次有1檔馬勝出，主角文家良馬房「摯友無敵」夥拍見習騎師黃皓楠，1檔起步由頭帶到尾，單Win及組合獨贏A2分別派78及33元。

文家良上周三（14日）晚於同一地點，贏一對夫婦馬主愛駒「翡翠福星」及「翡翠劇院」起孖。今場他以一對馬主陳國強同主馬「摯友無敵」及「好友無敵」雙龍出海，結果「摯友無敵」一放到底險勝短馬頭位，馬兒取得本身28個月以來久違的勝利，鞍上人黃皓楠在港累積44場頭馬，贏多一場就升格改減五磅。

蘇保羅同祈普敦今場合作馬「騰龍超影」，後上不及僅僅影相飲恨做二奶，但就破壞了陳國強120倍同主馬Ｑ的美夢，陳國強另一駒「好友無敵」賽前一日後備補出，配華將黎海榮以大冷身份後上第三，三歲馬在港首度上名，陳國強串Ｑ失敗，但開出30倍位置Ｑ仍和味。而今場第四名為大熱門「問鼎高峰」，四重彩派一萬八千幾。

「問鼎高峰」練馬師高伯新事先張揚，這晚不在現場督師，結果他全晚出四駒不勝，僅取一亞一殿，當中第二場跑第二的「紅旗飛將」與今場「問鼎高峰」都係大熱倒灶，輸咗投注獨贏的馬迷唔少真金白銀。