韋斯咸禮拜二晚喺英超作客般尼茅夫，踢到補時三分鐘俾主隊前鋒哥林威爾遜一個有相當爭議性嘅入波追平3:3。槌仔幫領隊莫耶斯賽後話，咁樣無咗三分同殺死佢係無分別！

般尼茅夫嘅入波係由哥林威爾遜將尼敦阿基喺門前掠過嘅頭槌攻門頂入網，但入波前哥林威爾遜似乎已經越位，而且有犯手球嘅嫌疑。入波嘅一刻旁證舉咗旗，但球證同旁證商量咗好耐之後，判入波有效。莫耶斯賽後透露：「球證好似係話旁證舉旗係因為有嘢需要留意一下，我從來未聽過呢啲解釋，咁樣失波同殺死我一樣，好難接受。」

莫耶斯之後繼續話：「咁旁證為乜舉旗呢？越位？如果係越位嘅話，好嘞，當係疑點利益歸於被告，算數嘞。但係如果對方球員咁樣舉起隻手就真係絕對唔得囉！」

般尼茅夫領隊賀維賽後承認：「睇嚟我哋真係執身彩，但我覺得球隊至少值得一場和波，我知韋斯咸好難接受呢個賽果嘅。」至於事件嘅主角哥林威爾遜就表示：「有時候判決係會唔理想，我只係做好前鋒嘅本份，跟住個波，再加少少動作咁啫。」被問到果個係乜嘢動作嘅時候，哥林威爾遜只係回答「Magic」就算。

----------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM