其實唔少藝人嘅真實身高及體重，都跟官方公佈嘅有少少出入，因此唔少藝人都好怕於節目中度高磅重，不過韓劇《愛上Pinocchio》女星李侑菲就因為拍攝《真的漢子300》、當女兵而被迫公開真實體重，結果顯示佢比官方公佈嘅數字，重咗近23磅，令佢非常無奈。

於前日播出嘅節目《真的漢子300》中，一眾新嚟報到嘅女兵都要進行健康檢查。當中李侑菲嘅官方網站表示其身高及體重為1.66米及92.5磅，不過節目就公開其真實身高及體重係1.63米及115磅，體重整整比官方數字重咗22.5磅，令李侑菲當場非常尷尬。事後李侑菲表示：「早知就穿短褲嚟，牛仔褲好重，會重2磅左右。」又指係體重機壞咗，不過網民就表示李侑菲體重好標準。

另外，女團BLACK PINK嘅Lisa就只得98.5磅，被指過瘦。雖然Lisa骨瘦如柴，但體力比一般女星好，更成為同期成績最好嘅女兵。

精選韓流，喺晒《娛果》
http://fb.com/appledailyent