大家樂（341）主席陳裕光位千金陳浩寧（Candice）最叻搞室內設計，自設室內設計公司，大家樂旗下唔少餐廳嘅設計都出自佢手筆。佢最近就試多瓣，幫好姊妹喺南韓首爾開嘅創投中心做室內設計，本月中開幕當日仲孖埋老公趙益坤一齊飛過去做介紹㖭。
Candice之前通常幫餐廳做室內設計，包括大家樂同埋大家樂旗下嘅奧利華超級三文治、意粉360度等等。最近，佢喺美國讀書時認識嘅好姊妹，即係內房企業金林置業太子女羅力力，喺首爾租落一幢五層樓連天台嘅寫字樓開創投中心，Candice於是就以友情價，用三個多月時間，幫對方做設計。

有小睡房 　設空中花園

大家都知facebook、Google等科網企業嘅寫字樓，比較多活動空間，Candice冇話參考佢哋，但喺設計時，真係會諗諗IT人嘅作息情況，於是整咗個小睡房，頂樓空中花園又特別加入有機種植園，畀多啲地方大家去放鬆心情。
年約30嘅Candice其實同好多本地富二、三代一樣，平時十分低調。不過，呢個創投中心本月16日開幕，Candice就特登同老公一齊去飛首爾，撐好姊妹之餘，仲親自介紹設計概念。活動完畢，佢就同老公一齊去附近嘅江南區濕平，幫19個月大嘅囝囝買衫仔，認真sweet。
香港家陣咁興韓式食肆，話唔定，佢順便幫爸爸搵下有乜正嘅地道食肆，可以引入香港㖭呀。

李華華
mailto:[email protected]