周柏豪今日喺銅鑼灣為新碟舉行簽唱會，約有過千粉絲逼爆商場。活動中，柏豪同女粉絲大玩遊戲，幫粉絲帶頸巾、搽唇膏、手拖手、抱抱、餵食蛋糕，搞到全場粉絲尖叫。

柏豪事後表示由於今年要喺內地做巡迴，所以已有年幾冇見粉絲，佢話：「因為走得太耐，所以有啲頒獎禮投票，自己入唔到圍係有原因。當然係有啲失落，但今日見到咁多嚟自唔同地方同城市嘅歌迷，係好感動，我就做好自己去報答佢哋。」

問佢係咪順便為自己拉票？柏豪話：「拉唔切o架喇，今日我有首歌《老少平安》攞咗4台冠軍，另一首《男人背後》之前都攞過4台冠軍，原來我啲歌派親台都係no.1，所以成績係有，但只係好少面對面一齊玩，我希望多啲時間喺香港，大家先覺得人氣有喺度。」提到佢喺活動中賣大包，同粉絲又拖又抱，柏豪表示：「一定要，將心比心，我去見偶像，如果佢係hea我，我都會唔開心，我身為一個偶像，就要做好我自己。」

對於趕唔切為自己拉票，柏豪表示係有失落：「以前慣性，大家去投票，咁就唔使擔心，今年放少咗時間喺香港，大家未必會咁踴躍去投票，永遠都係等號，我喺香港做少咗嘢，大家未必會咁記得我，但幸好自己嘅歌迷仲好穩固。」佢透露仲有兩場巡迴未做，但公司已幫佢簽咗下一個巡迴演唱會：「因為拍咗劇集，所以多咗唔同嘅機會。」此外，柏豪嘅《烏托邦》入圍無綫台慶頒獎禮嘅「最受歡迎電視歌曲」，佢話有信心，仲好開心楊千嬅咁撐佢。

精選娛聞，喺晒《娛果》
http://fb.com/appledailyent