尚有三個半月就到立法會選舉，各黨陸續擺平參選人選問題，開始正式備戰，白鴿黨緊跟北京指導思想，一於「內強質素」，今個月底會舉行一個「補習班」，八方收到風，白鴿黨請來幾個星級導師指點候選人，其中一位係神枱級填詞人夕爺林夕。
呢個月底舉行嘅「與文化人交流」活動，雖然歡迎所有黨員參加，但特別提到一啲獲推薦參選嘅準候選人應該到場，除咗夕爺，幾位經常喺傳媒曝光嘅文化人，包括梁文道、邵家臻同胡恩威都會出席。白鴿黨指四人會就該黨近年喺文化工作同城市規劃方面表現作出檢視，又會為該黨未來年輕人工作、市集政策、社區活化等提出意見。
白鴿黨核心人士同八方講，該黨政策研究工作素來頗為紮實，每年就財政預算案做嘅建議書，就令唔少高官另眼相看，但喺近年「流行」嘅新議題方面卻要做多啲工夫，好似規劃同保育議題等，就俾公民黨搶唔少風頭。
呢位人士指其中一個原因，同公民黨有幾多呢方面專業人士黨員有關，白鴿黨不能太落後於形勢，所以要搵外人教路。
搵夕爺講幾句，可唔可以令白鴿黨脫胎換骨呢？呢位人士承認冇乜可能，佢哋亦冇咁嘅意思，因為白鴿黨金漆招牌係「堅定可信」。公民黨方面，連續出招省靚「好在仲有公民黨」招牌，八方聽聞繼「一杯清水」同「落雨擔遮」後，稍後仲有新廣告喺港鐵車站出現，該黨亦開始為有意參選黨員舉辦備戰講座。

公民黨成立日子尚短，不過選舉經驗都唔算少，其中梁家傑參選特首一役更係經典作，幫梁家傑做模擬辯論嘅郭榮鏗同黃明樂，就被召上陣教一班準候選人辯論同應付傳媒技巧，至於該黨選舉經驗最豐富嘅，唔講真係唔知，竟然係梁家傑太太陳淑儀。
陳淑儀冇參選經驗，不過助選經驗豐富，多次為吳靄儀助選，余若薇首次參選，就係搵佢做選舉經理人，梁家傑選特首、陳太補選佢都擔當吃重角色，對組織選舉、管理助選團、財政分配同選舉條例都好熟悉，堪稱公民黨「金牌經理人」，由佢指點公民黨新丁，不作他選。

mailto:[email protected]