【婚期將至】趕出席陳柏宇婚禮 林奕匡明年補擺喜酒
蘋果日報 2017/06/20 18:30
黃浩琳林奕匡
林奕匡（Phil）同師妹黃浩琳今日喺中環，出席下月公演嘅俄羅斯舞台劇《下雪了-斯拉法的布蘭詩歌 》記者會，兩人仲即場用電子琴同Saxophone演奏，劇內其中一段音樂。
婚期將至嘅林奕匡透露，今個星期五就要出發到外地影婚紗相，佢話：「仲有好多工作要趕喺出發前做好，好似新碟要開會定好創作方向。」佢話要離港一個星期：「去邊度影就遲啲話畀大家聽，仲要趕返嚟出席陳柏宇嘅婚禮。」
Phil話自己婚期在8月，喺加拿大註冊：「明年先至返嚟補擺喜酒，而家暫定3月，但其實應該要開始Book場地，但仲未搞。」見到同公司嘅師兄全部都結婚，黃浩琳又點呢？佢話：「 唔單止公司，身邊都有好多朋友陸續結婚生仔，都有人問幾時輪到我。」 黃浩琳笑言或者叫Phil介紹啲兄弟團俾佢，點知Phil話：「我啲兄弟全部大部分都結晒婚㗎啦。」
（攝影：曹家誠）
林奕匡同師妹黃浩琳兩人仲即場用電子琴同Saxophone演奏。
黃浩琳身邊都有好多朋友陸續結婚生仔，都有人問幾時輪到佢。
林奕匡透露今個星期五就要出發到外地影婚紗相。
黃浩琳笑言或者叫Phil介紹啲兄弟團俾佢。