由林建明(大姐明)創辦「心睛行動」喺天水圍營運嘅市集日前正式開幕，前財爺曾俊華、萬綺雯(蚊蚊)同蔡國威應邀出席，韓國行為藝術家Woopsyang發起嘅發呆比賽將會喺呢個月31號舉行，今次受惠機構係心晴行動，身為心睛之友嘅蚊蚊，佢都話自己都會選擇發呆去處理情緒問題。

蚊蚊仲話有一次喺海邊睇日落發呆嘅時候，竟然令佢有一個意想不到嘅經驗，佢話：「嗰陣我諗住想靜一靜，點知有途人睇到我一個女仔坐喺海邊，以為我想做傻事，於是佢走埋嚟關心我，問我發生咗乜嘢事，其實人與人可以好有人情味，我覺得自我放鬆係好重要，試吓乜嘢都唔做，靜一靜，當你放鬆晒之後站番起身，再次面對社會，你就會知道之後嘅路點樣走！」

佢又話如果遇到情緒困擾，千祈唔好翻舊帳：「今日嘅問題就係今日嘅事，如果將以前發生嘅事拉埋一齊，好容易將自己逼入死角，所以最好係搵朋友同屋企人傾訴，諗辦法解決！」估唔到曾俊華都好支持發呆，佢話：「我好鼓勵家長俾小朋友多啲些發呆時間，可以增加思考。我有時都會搵朋友傾偈，每人都會遇到困難，但辦法總比問題多，只要保持信心，以開闊嘅眼光，乜嘢都可以解決！」

精選娛聞，喺晒《娛果》
http://fb.com/appledailyent