陳凱琳同方健儀今日去到紅磡，出席星夢郵輪記者會。陳凱琳話怕俾人認得出，未試過同男友鄭嘉穎搭郵輪旅遊，但以前就同屋企人去過兩次：「上到船就好開心，可以亂玩、食嘢，好放鬆。」

活動上，大會送咗個郵輪假期俾陳凱琳，唔知佢想同邊個去呢？陳凱琳咁答：「我都要問清楚幾多張先？如果得兩張，冇理由丟低爹哋媽咪是但一個。」記者笑佢點解唔同嘉穎去？陳凱琳先話：「係啦，都可能。」

講到如果同男友搭郵輪去旅行，陳凱琳就話：「如果係，都未必會喺香港出發，可能去冰島啦，我鍾意去凍啲地方，都幾寫意。」記者提議可以喺冰島結埋婚，陳凱琳不置可否，但就咁講：「着嗰啲裙（婚紗裙）好凍，咁不如着羽絨婚紗啦。」佢仲透露同嘉穎計劃緊去旅行，但最快都要過咗台慶先。