一年一度之打吡大賽，今個星期日舉行。所有馬主都希望有隻馬參加打吡，贏唔到都可以威一威，有錢嘅大馬主更加抱有熱切期望。
今年十四匹打吡參賽馬之中，六匹馬如叻蝦王、芙蓉鎮、五五波、富盈、不老傳奇、步步叻，都夠晒評分資格。但睇深一層，呢六隻馬都好難贏到打吡啫，六隻都係跑千四米最好，跑到千六已經勉強，而打吡路程係二千米，點夠長力呀？除非到時十四隻馬都放棄前段、鬥爬，單跑一條直路，呢六隻高分馬先至有機會。

馬主Ｋ一心買隻好馬返嚟跑打吡，點知隻馬適應需時，而馬會編排賽事側重中短途（一千至千六米），千八米比較少，二千米以上賽程更缺乏，馬主Ｋ隻馬係正宗長途馬，夾硬谷起去跑中短途嚟做熱身，輸咗三四場，減咗分，冇資格參賽，馬主Ｋ為之大發牢騷：「馬會編賽程太過偏心，我以後都唔買長途馬咯。馬會話長途賽不受馬主歡迎，報名馬少，其實倒果為因，你成日編多啲千四、千六米，凡馬主都知道最好就係買澳紐中短途馬最實際，買英愛長途馬盞嘥養馬費。結果就係我哋啲國際盃、女皇盃大賽變成係外國馬嘅提款機，俾人哋贏晒啲獎金！」
馬主Ｋ發牢騷，並唔係第一個，以前亦有馬主表達不滿，不過冇人理會啫。因此大部份馬主都指定要買適合千二至千六米嘅馬，最好能夠跑快活谷一六五○米㖭，咁就成日有得過癮。正宗英國、愛爾蘭長途馬比較遲熟，三歲來港，分分鐘要到五歲先至有表現，馬主等到頸都長，點似得買隻澳洲短途馬，夠晒早熟，雖話會早殘，起碼有得玩吓先。