【桌球】摘世青賽銀牌入選傑青 14歲符歡望再創佳績
傑出青少年運動員賀曦彤卡比多羅比曾楚喬符歡
傑出青少年運動員選舉2019年第三季頒獎典禮周四假香港體育學院舉行,包括單車將李思穎和美式桌球手卡比多羅比(Robbie)在內共30位運動員得獎,後者的拍檔符歡今年連奪亞少冠軍和世青亞軍,他指今年訓練時數大增,但一分耕耘,一分收穫,明年冀再創佳績。
英雄出少年,14歲的符歡年中先夥拍Robbie奪亞少雙打冠軍,上月再於世青摘下U17銀牌,他透露今年升至精英組,每月訓練時數由60小時增至100小時,家住港島的他每日都要赴沙田訓練,「今年都好辛苦,訓練多咗好多,通常練完波返到屋企都九點半,要趁午飯時間做功課。」他並指自己大賽經驗尚淺,感激Robbie提攜照顧,「佢好好,會好仔細咁教我打邊隻波,打亞少時都有壓力,佢又同我講好多笑話令我放鬆。」
至於另一得獎者羽毛球運動員高城熙指考畢DSE將轉為全職運動員,「我好細個已經有打全職嘅諗法,但點都考埋DSE先,希望考到最低要求,到時出成績,就再睇吓達到邊間大學嘅運動員計劃成績要求。」今季最年輕得獎者則為年僅11歲的武術運動員曾楚喬,她早前於亞洲青少年錦標賽女子兒童組刀術封后,其12歲的師姐賀曦彤亦獲嘉許,她於同一賽事更包攬南刀和南拳兩金。
--------------------
【匿名港警爆大鑊】
韓國KBS時事節目《時事直擊:香港 被自殺》
一按即睇 --------------------
【撐學生】召集有心人 撐學生全年睇《蘋果》
立即按此 --------------------
《體蘋果》陪你睇波講波
https://www.fb.com/appledailysports