陳貝兒主持大台節目《嫁到這世界邊端2》就快播，今年7月起去咗歐洲五個國家尋找異鄉人妻，全程40日，總共要坐19程飛機，行程去到第37日，貝兒抵唔住土耳其全日41度高溫，不幸中暑，半夜要入院吊鹽水。（新聞連結： https://bit.ly/2NLAITv ）貝兒近日為節目做後期，又壓力爆煲，飲唔夠水，被腎石玩殘要留院。

《蘋果》上周二獨家到貝兒因肚痛入院睇急症，痛到要坐輸椅，喺養和又撞正冇晒病房，狼狽情況下撲病房轉院。（新聞連結： https://bit.ly/2zUD9iE ）經醫生診治，貝兒留院時排出腎石。佢今日就喺將軍澳出席咗《嫁到這世界邊端2》記者會，着住斜肩裙嘅佢弱不襟風，問到佢留院一事，佢聲沙沙話：「有腎石，最大嗰粒有4mm，當時痛到似人生仔咁，我體會到喇，醫生幫我處理咗最嚴重嘅問題，我平時真係飲唔夠水，每日要飲2公升，加上唔夠休息，喺留院時都做咗好多body check，身體其他機能係正常。」

貝兒話朋友話佢唔識照顧自己，問佢外景拍攝節目有冇艷遇？佢話：「冇艷，但都識到啲新朋友，佢哋都有問候。」貝兒為《嫁2》黑仔連環入院，卻被誤解為節目宣傳，貝兒無奈咁話：「有需要我可以攞報告出嚟，咁我唔可以控制粒膽石幾時爆出嚟。」係咪個節目唔旺你？貝兒笑言要問監製攞番封利是。

精選娛聞，喺晒《娛果》
http://fb.com/appledailyent