當年今日
關於我們

異動空間:沽空港交所等開飯 - 魏力

蘋果日報 2011/09/15 00:00


咪以為個市倒升兼重上萬九關,後市可睇高一線,查實港股弱到七彩!恒指昨日曾跌穿上月低位18868,低見18627,成交飆至814億銀,反映沽壓極大。再者,周一裂口大插後,根本無力補回裂口,指數高位逐日下移,後市惟有「獨沽求勝」!
睇淡大市,沽空港交所(388)屬必然之選。港交所8成收入來自成交及上市費,但兩者下半年表現乏善足陳。上半年日均成交736億銀,7月至今已跌至720億銀,單睇9月半個月更劇減至670億銀。市況差成咁,大戶散戶都唔落場,交投恐繼續縮水。
新股方面,7月至今有16隻新股掛牌,但都係碎料,加埋集資得150億銀。市況不濟,重磅新股如光大銀行、三一重工、徐工都冇晒聲氣,曼聯又俾新加坡搶埋,要Keep到上半年1747億銀集資額,難過登天!去年下半年,公司賺27.8億銀,今年上半年已降至25.84億銀,環比跌7%,下半年勢將繼續倒退。
再睇沽空額,昨日高逾2億銀,佔成交20%,近排沽空比率維持15%以上。「空軍」壓境,後市跌到應一應!走勢上,港交所連續兩日跌穿保力加通道底部,MACD再現熊差距,走勢差劣,成交仲越來越大,保守估計,要跌到120蚊先有支持。
魏力