【深得奶奶心】鄭俊弘媽媽激讚新抱又乖又靚 11月婚宴由何雁詩搞晒
蘋果日報 2020/03/09 22:43
陳昭昭鄭俊弘何雁詩朱詠珊
（右圖攝影：黃曉妍）
陳昭昭、鄭俊弘媽媽朱詠珊、顏仟汶、吳堯堯等今晚在新蒲崗，以國語灌錄抗疫歌《明天更好》，曾主唱《傷感雨天》的方麗盈負責糾正大家的拍子和音準。
昭昭表示抗疫歌將在不同播放平台播出：「呢首歌由鄧汝超編，佢喺加拿大有唱片公司，所以除咗中國、港澳、加拿大都會播。」原來鄧汝超之前亦有邀請鄭俊弘一起合唱，但因為對方太忙，所以由鄭媽媽代勞，鄭媽媽說：「我平時唱開粵曲，我怕音唔準，所以要練習。」有否向兒子請教唱歌？她笑說：「冇呀，佢都好忙，又要拍劇，又要練歌，同埋因為佢哋TVB唱咗一首抗疫歌，所以唔可以重疊，所以阿媽代勞。」
對於囝囝鄭俊弘與何雁詩將於年尾舉行的婚禮，鄭媽媽對新抱仔讚不絕口：「人又靚，又乖，最緊要佢哋開心。」她笑言仍未買嫁妝給新抱：「而家啲金咁貴，都唔知點算，好煩惱，不過年尾，仲有時間。」問到疫情有否影響婚宴的進度？鄭媽媽說：「佢哋11月，我希望疫情一定一定要過晒，其實所有嘢都係新抱仔搞，我只係負責出席。」
至於久未公開露面的方麗盈，她透露現時是自由身，平時都會周圍表演，亦有錄歌，但未有公開發行，都能夠糊口：「我除咗唱歌之外，仲有做司儀、製作，同埋做特約拍《愛‧回家之開心速遞》，啱啱上星期五先出街。」
採訪、攝影：黃曉妍
陳昭昭、鄭俊弘媽媽朱詠珊、顏仟汶、吳堯堯等今晚在新蒲崗，以國語灌錄抗疫歌《明天更好》
鄧汝超之前亦有邀請鄭俊弘一起合唱，但因為對方太忙，所以由鄭媽媽代勞