噚日係梁詠琪（GiGi）36歲生日，前一晚GiGi同西班牙籍老公Sergio，仲有孖生細佬梁詠俊、李心潔等一齊慶祝。可能因為怕畀人騷擾，所以GiGi寧願留喺屋企，同老公煮飯仔招呼大家，GiGi喺微博放咗張食物相，見全枱八個餸賣相一流，真係入得廚房出得廳堂。

采妮送蛋糕

GiGi留言話：「謝謝昨天（即前日）朋友們為我和孖生弟弟和阿詩兒子Woody慶祝生日！我們三個都是勇敢的牡羊座唷！除了朋友的地道泰國菜外，當然少不了我們下廚的西班牙菜式……」食完飯仲放咗張大合照，GiGi同老公頭貼頭，好鬼sweet。
好姊妹楊采妮雖然去唔到，但送咗個卡通公仔蛋糕，佢話：「親愛的GiGi，還有自從詩詩六年前生了可愛的Woody後，每年我們都會為這兩位birthdayboyandlady，送上卡通蛋糕，抱歉我今年未能趕上party，但送上特別訂造，充滿祝福的angrybirdsss蛋糕！要幸福，快樂啊！」天心同徐若瑄亦喺微博送上祝福。不過，GiGi一向都事業心重，噚日正日生日都要去錄音室開工錄新歌。