由韓國影帝宋康昊夥拍劉海鎮、柳俊烈主演嘅新片《逆權司機》將於聽日喺香港上映，電影改編自真人真事，以1980年光州事件做背景，電影公司亦用心製作，務求真實，製作組特地搵返當年款式嘅的士。

現時為人熟悉嘅韓國的士分為銀色、橙色及黑色三種，不過韓國70至90年代嘅的士只分咗綠色、黃色兩種，分別係個人的士及的士公司經營嘅的士，而車嘅型號多為Brisa及Pony，外型較細及圓。韓國當年除咗綠色、黃色的士外，仲有一種係酒店的士，據知電影中宋康昊飾演「宋萬燮」嘅原型人物「金士福」就係酒店的士司機。

酒店的士早於1969年出現，係酒店為咗接載外國人而設，所以酒店的士司機多數都會識少許外語。酒店的士與一般的士嘅不同之處，就係酒店的士係黑色，而且車頂上冇「的士」字眼嘅標示。隨住酒店的士司機被揭濫收車資、揀客等唔好嘅行為後，於1985年被取消。

不過為咗容易管理，2000年起首爾嘅的士幾乎統一為銀色、橙色及黑色，據知銀色為個人的士、橙色為的士公司經營嘅的士，至於被稱為模範的士嘅黑色的士主要針對外國遊客，經營模式與當年嘅酒店的士相似。