舒淇多年來因為工作壓力和生活失衡，導致皮膚敏感，去年12月她突然在微博貼貓相留言：「暫告演員生涯，承蒙錯愛……各位，江湖再見。」一度被誤以為懷孕了，之後她澄清，一切是因為皮膚病發，要好好休息。
舒淇前晚終在江湖再見，她現身奧海城出席「無國界醫生電影節2018」開幕禮，支持關注無國界醫生工作，關注電影。精神不俗的舒淇，表示皮膚已經大有改善：「𠵱家休息緊，休息咗兩個月，都好番七、八成，可能太耐冇休息，自己嘅病對電影工作，只係一樣好少嘅事。」
41歲的舒淇之前留言被誤以為成功懷孕，問她繼續休息會否怕再次被人懷疑？她說：「如果有，都冇所謂，順其自然囉！」她更直認現正調理身體，隨時準備生仔，不過老公馮德倫是大忙人，能否可以安排造人時間？她說：「還好，自己先休息，如果敏感好番，𠵱家天氣凍冇咁易發，夏天唔發就真係好番晒，所以希望休息埋個夏天。」至於會否趁機造人，舒淇尷尬笑說：「可以有好多嘢做。」

日日情人節

農曆新年將至，已婚的舒淇不用再孤獨外遊，她說：「𠵱家有家室，兩邊家庭。」至於情人節，她說：「開心就日日情人節。」但是舒淇難得放假，又有時間，她笑說：「係喎！等我返去諗吓先。」
舒淇又提到無國界醫生的紀錄片：「無國界醫生工作好艱辛，頭先睇片睇到眼濕濕，自己𠵱家生活好好，見到啲片段都好難受，諗起都好傷心。」問她會否有機會跟無國界醫生去探訪？她說：「冇，無國界醫生去嘅地方都好危險，係一個偉大義工工作，自己希望大家多啲支持，傳遞呢個訊息。」
採訪、攝影：張俊銘