告東尼向來知人善用，上季與潘頓合作52次取10冠10亞5季，上名率高達48%，今季暫合作三戰冠亞各一。

這個夢幻組合於周末（22日）有第四場「美麗日子」出王牌上陣，有望再添佳績。

第四場四班草地1600米：「美麗日子」乃「美麗之星」（已退役）全兄弟，1400至1800米都是射程範圍，目前睇成就未必有其兄般犀利，但相信三班夠用，上季三歲出道，演出未夠穩定，踏入今季思想及體型明顯比上季成熟得多。

上仗復出跑1400米，可能受隔離「舉世無雙」起擒影響專注力，出閘即見潘頓連打四鞭，入彎一度甩口又打九鞭，入直路以為墮退之際，鞍上人左右開弓，連打13鞭。

最後100米才撻着後勁，僅後追不及「贏馬神器」輸馬頸位，隔三周增程跑1600米，加程會更加合適，雖排14檔，但預計無快放馬，可輕鬆埋欄，係時候見真章。

第九場三班草地1400米：日前「山竹」襲港取消賽事，原本兩組三班1400米的參戰馬，有部份匆匆再上陣，「按得澄」上季4月跑後，因右前腿懸韌帶起端懷疑受傷。

上仗久休153日復出，賽前只彈一課細閘，體重比前仗重59磅，所有不利條件集一身，跑嫌短1200米志在熱身，入直路一度被「良才」擋住無位出，拉士200米回氣再上與「一定賺」鬥到影相輸跑第三，忠心表現顯露無遺。

拼後三日已經在內圈復課，健康無問題，體重公佈1,246磅，比上仗輕身13磅，大馬跑過熱身後，戰鬥力提升，跑1400米六戰兩冠一亞一季，馬房部署打鐵趁熱。