成立咗4年、維持0議席嘅政黨「新思維」,嚟緊星期六(13日)開會員大會,選出新一屆執委;就喺同一日,佢哋嘅現任副主席鄭承隆就會正式退黨。鄭承隆同八方講,呢次退出,無非有感以組織形式行中間路線已經行唔到落去,不如孤身上路。至於係咪為選舉鋪路?佢斷然話唔係。
今日(9日)係新思維報名參選執委嘅截止日期,鄭承隆並無交表,仲打算喺會員大會當日提出退黨。之所以有呢個決定,佢話係因為見到市民喺政治問題上好對立,再加上新思維嘅問題,故認為繼續留喺度,只會令佢議政時嘅中立性受到影響,就以佢較為熟悉嘅警務問題,一開聲唔係俾人話係舐共、就係俾人話佢氹市民,咁點講落去呢?
鄭承隆係新思維嘅創黨成員之一,睇住個黨行咗4年,相信百般感受。佢形容新思維出現咗啲混亂,譬如面對重大議題,相對建制嘅成員大有意見,相對泛民嘅人又覺得啲意見太過建制,其間又發生例如黃成智唔跟黨決定去參選呢啲情況。
思前想後,不如分手。佢好坦白咁話:「我喺新思維無攞到啲乜嘢,又無喺政府多咗公職。」未來堅持行中間路線,因為佢相信,今日北京要立「港版國安法」,都係因為香港無咗中間路線,只係佢覺得自己單拖行可能仲好,「唔覺得離開(新思維)會勢孤力弱咗,不嬲都自己上路、自己行緊啦!」佢話慶幸自己泛民、建制兩邊嘅朋友都有,當市民有需要嘅時候,兩邊嘅人都願意真心落力幫佢。
搞咁多嘢,莫非都係為9月選舉?佢肯肯定咁話無,仲話正因為唔諗住參選,泛民、建制兩邊嘅人都唔覺得佢係想攞光環,幫佢嘅時候更落力,所以佢都幾享受可以咁樣行呢條中間路線;而只要幫到人,根本「唔一定要嗰張櫈(議席)」。
-----------------------------
打國際線 《蘋果》英文版免費試睇
按此了解更多 英文版已登錄新版《蘋果》App
按此下載/更新 -----------------------------
《囚牢之疆》 專頁
揭開集中營邪惡面紗
獲2020年人權新聞獎「多媒體(中文)」大獎
-----------------------------
App內1-Click訂閱《蘋果動新聞》
按此了解更多